~  जीवनको अस्तित्व

आमा जोगाऊ मलाई

यो स्वार्थी संसारबाट

जीवनको प्रवाह र गति

मन्द भएको छ

डगमगाइरहेको छ

जीवनको डुङ्गा

कसरी तरूँला म !

यो जीवनको भवसागर

आमा जीवनको प्रवाहले

रूप फेरिरहँदा

म असहाय हुन पुग्छु

आऊ र बचाऊ आमा मलाई !

दयालु र स्नेही हो तिमी

हे आमा पार लगाऊ मलाई

यस निर्दयी संसारबाट

तिम्रो दिव्य रूप देख्न सक्ने

तिम्रो ममताशक्ति बुझ्न सक्ने

सामर्थ्य छैन मेरो

मेरो लालन गर्यो

पालन गर्यो

र गर्यो ताडन पनि

तिम्रै पुरस्कार त हो यो जीवन

तिरस्कार तिम्रो सहन सक्दिनँ म

दया, स्नेह र ममता देऊ

जीवनरूपी डुङ्गालाई पार लाउने

शक्ति र ऊर्जा देऊ ।

सम्पूर्ण सकारात्मकताकी

खानी हो तिमी

अपनत्व र स्नेहकी रानी हौ तिमी

हामी सन्तानका आँखाकी नानी हो तिमी

प्रकृतिले फुर्सदमा निर्माण गरेको

ममताकी सुनखानी हो तिमी

आमा तिम्र अस्तित्वबाट

उपहार पाएको हो मैले पनि ।

मेरो अस्तित्व

आमा! जोगाऊ मलाई

यो जीवनको भवसागरबाट

आमा भन्नु नै जीवन हो

र आमा भन्नु नै

जीवनको अस्तित्व हो ।

खड्गबहादुर बोहरा (नेपालगन्ज, बाँके)